- 339 -

1388. Feb. 6. Liegnitz.

Herzog Ruprecht bekennt, dass der Rath von Liegnitz ihm abgetreten hat das Landgericht auf dem Dorfe Tentschel, dafür verleiht er ihm für sich und als Vormund seiner Brüder die obersten und niedersten Gerichte überall im liegnitschen Weichbilds.

Wir Ruprecht von gotis gnadinn .. herczoge in Slezien vnd herre zu Legnicz bekennen vffinlich mit desim briue, das wir habin angesehin getrowe willige dinste, die vns vnsir getrowe liebin burgermeister vnd rathmanne vnsir stat Legnicz, die nv yczunt sin vnd vor enn gewest sin vnd noch enn werdin, vfte vnd vil getan han vnd noch wol getuen mogin vnd sullin, vnd vornemlich, das sie vns vfgelossin habin vnd sin vns abegetretin des landgerichtes vf deme dorphe vnd gute czum Tencschil vnsirs legniczisschin wiechbildis mit allenn herscheftenn, nuczperkeitenn, friheitenn vnd rechtenn, alse sie es gehabit vnd besessin han, zu haben, zu besiczen vnd czu genysen, czu vorkoufin, vnd czuvorgebin, vnd domete czutun und zulossin, wie vns das behagit allirbeste, vnd habin enn dorumbe mit rathe vnsir getrowen eldestin von vnsir selbis wegin, vnd von der hochgebornen fursten .. herczogin Wenczlaus, Bonczlaus vnd Heynrichs vnsir lieben bruder wegin, der vormunde wir yczunt sin, die mit vns erpherren sin zu Legnicz, vnd von vnsir erbenn vnd nochkomlinge wegin erpherren doselbist zu Legnicz gegebin, vnd sin enn abegetretin vnd haben enn ufgelossin vnd gelehin alle gerichte obirste vnd nedirste, nichtes awszunemen, vf allenn strossin, wegin vnd stegin in vnserm wiechbilde czu Legnicz obiral in allenn sachin, die das landgerichte antreffin vnd globin enn, das wir vns doryn nicht legin wellin noch der vndirwyndin, auch begnadinn wir sie domete, das alle czoge, dyede gescheen ym landgerichte, folgin sullin in der statgerichte vnd nicht andirswohen; sunderlich begnadinn wir sie domete, das alle mytlewte, diede siczen in gerichten, in kreczemen, in vorwerken vnd in andirn gutern vnsirs landis, sullin czu recht steen vor deme erpvoyte zu Legnicz allen den, die sie czubeteidingen habin vnd czu beclagin. Gegebin zu sychirheit vndir vnserm gemeynen ingesegil czu Legnicz noch Cristes geburde vnsirs liebin herren dryczhenhundirt jare ym acht vnd achtczigesten jare am nehsten dunrstage vor allir manne fastnachte.

O. d. St. L. No. 169. An Pergamentstreifen das zur Hälfte abgesprungene Siegel. — Bitschens Privilegb. f. XVIIb.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866